ନୂଆଦିଲ୍ଲୀ: ଉପରାଷ୍ଟ୍ରପତି ଧନଖଡଙ୍କ ଇସ୍ତଫାକୁ ଗ୍ରହଣ କଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ପରବର୍ତ୍ତୀ କାର୍ଯ୍ୟପନ୍ଥା ପାଇଁ ଗୃହ ମନ୍ତ୍ରାଳୟଙ୍କୁ ପଠାଇଲେ। ସୋମବାର ଉପରାଷ୍ଟ୍ରପତି ପଦରୁ ଇସ୍ତଫା ଦେଇଥିଲେ, ଜଗଦୀପ ଧନଖଡ । ସ୍ୱାସ୍ଥ୍ୟଗତ କାରଣ ଦର୍ଶାଇ ତୁରନ୍ତ ପ୍ରଭାବରୁ ତାଙ୍କ ପଦରୁ ଇସ୍ତଫା ଦେଇଛନ୍ତି । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଏକ ଚିଠିରେ ସେ କହିଛନ୍ତି ଯେ ଡାକ୍ତରଙ୍କ ପରାମର୍ଶ ଓ ସ୍ୱାସ୍ଥ୍ୟକୁ ପ୍ରାଥମିକତା ଦେଇ ସେ ସମ୍ବିଧାନର ଧାରା ୬୭(କ) ଅନୁଯାୟୀ ଇସ୍ତଫା ଦେଉଛନ୍ତି । ଧନଖଡ ରାଷ୍ଟ୍ରପତିଙ୍କୁ ତାଙ୍କ ସହଯୋଗ ଏବଂ ସୌହାର୍ଦ୍ଦ୍ୟପୂର୍ଣ୍ଣ ସମ୍ପର୍କ ପାଇଁ ଧନ୍ୟବାଦ ଜଣାଇଛନ୍ତି। ସେ ପ୍ରଧାନମନ୍ତ୍ରୀ ଏବଂ ମନ୍ତ୍ରୀ ପରିଷଦକୁ ମଧ୍ୟ ସେମାନଙ୍କ ମାର୍ଗଦର୍ଶନ ଏବଂ ସମର୍ଥନ ପାଇଁ ଧନ୍ୟବାଦ ଜଣାଇଛନ୍ତି।ସଂସଦର ମୌସୁମୀ ଅଧିବେଶନର ପ୍ରଥମ ଦିନରେ ତାଙ୍କ ଇସ୍ତଫାପତ୍ର ବହୁତ ଆଶ୍ଚର୍ଯ୍ୟଜନକ। ସେ ଦିନ ସମୟରେ ରାଜ୍ୟସଭାରେ ଉପସ୍ଥିତ ଥିଲେ, ଯେଉଁଠାରେ ଅପରେସନ ସିନ୍ଦୁର ଏବଂ ପହଲଗାମ ଆକ୍ରମଣକୁ ନେଇ ଗୃହର ନେତା ଜେପି ନଡ୍ଡା ଓ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେଙ୍କ ମଧ୍ୟରେ ବିତର୍କ ହୋଇଥିଲା। ପରେ ସେ ବିରୋଧୀ ଏବଂ ଶାସକ ଦଳର ଏକ ବୈଠକ ଡାକିଥିଲେ, ଯେଉଁଥିରେ ଶାସକ ଦଳର ସାଂସଦମାନେ ପହଞ୍ଚି ନଥିଲେ ବୋଲି କୁହାଯାଉଛି। ଏହା ପରେ, ବିଳମ୍ବିତ ସନ୍ଧ୍ୟାରେ ଜଗଦୀପ ଧନଖଡ ତାଙ୍କ ଇସ୍ତଫା ଘୋଷଣା କରିଥିଲେ ।
