ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଦେଶବାସୀଙ୍କୁ ସମ୍ବୋଧିତ କରି ସମସ୍ତଙ୍କୁ ନବରାତ୍ରୀର ଶୁଭେଚ୍ଛା ଜଣାଇଥିଲେ । ଏଥିସହ GST ସଂସ୍କାର ସୋମବାର ସୂର୍ଯ୍ୟୋଦୟରୁ କାର୍ଯ୍ୟକାରୀ ହେବାକୁ ଯାଉଥିବାରୁ ‘GST ସଞ୍ଚୟ ଉତ୍ସବ’ ପାଳନ ଲାଗି ଦେଶବାସୀଙ୍କୁ ଆହ୍ବାନ ଦେଇଛନ୍ତି। ଏହି ଭାଷଣ ସମୟରେ ପ୍ରଧାନମନ୍ତ୍ରୀ ମୋଦୀ ସ୍ୱଦେଶୀ ଉତ୍ପାଦର ଗୁରୁତ୍ୱ ଉପରେ ଗୁରୁତ୍ୱାରୋପ କରିଥିଲେ ଏବଂ ଲୋକମାନଙ୍କୁ ସେଗୁଡ଼ିକୁ ବ୍ୟବହାର କରିବାକୁ ଅନୁରୋଧ କରିଥିଲେ।
ପ୍ରଧାନମନ୍ତ୍ରୀ ମୋଦୀ କହିଛନ୍ତି, “ଏହି ଉତ୍ସବ ଋତୁ ସମସ୍ତଙ୍କ ପାଇଁ ମିଠା ଆଣିଦେବ। ଦେଶର ପ୍ରତ୍ୟେକ ପରିବାରରେ ଖୁସି ବୃଦ୍ଧି ପାଇବ । ଆଗାମୀ ପିଢ଼ିର GST ସଂସ୍କାର ଏବଂ “ସଞ୍ଚୟ ମହୋତ୍ସବ” ପାଇଁ ମୁଁ ଦେଶବ୍ୟାପୀ ଲକ୍ଷ ଲକ୍ଷ ପରିବାରକୁ ମୋର ହୃଦୟରୁ ଅଭିନନ୍ଦନ ଏବଂ ଶୁଭେଚ୍ଛା ଜଣାଉଛି। ଏହି ସଂସ୍କାରଗୁଡ଼ିକ ଭାରତର ଅଭିବୃଦ୍ଧିକୁ ତ୍ୱରାନ୍ୱିତ କରିବ, ବ୍ୟବସାୟକୁ ସରଳ କରିବ, ନିବେଶକୁ ଅଧିକ ଆକର୍ଷଣୀୟ କରିବ ଏବଂ ପ୍ରତ୍ୟେକ ରାଜ୍ୟକୁ ବିକାଶ ଦୌଡ଼ରେ ସମାନ ଅଂଶୀଦାର କରିବ ।”ପୂର୍ବ ଟିକସ ବ୍ୟବସ୍ଥା, ଯାହା ବିଭିନ୍ନ ଟିକସର ମିଶ୍ରଣ ଥିଲା, ସାଧାରଣ ନାଗରିକଙ୍କୁ କ୍ଷତି ପହଞ୍ଚାଇଥିଲା। ଆମେ ଜନସ୍ୱାର୍ଥ ଏବଂ ଜାତୀୟ ସ୍ୱାର୍ଥରେ ଜିଏସଟି ଲାଗୁ କରିଥିଲୁ। ଏବେ ଦେଶ ଡଜନ ଡଜନ ଟିକସର ବୋଝରୁ ମୁକ୍ତ। ‘ଏକ ରାଷ୍ଟ୍ର, ଏକ ଟିକସ’ର ସ୍ୱପ୍ନ ବାସ୍ତବରେ ପରିଣତ ହୋଇଛି ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି । ଏଥିସହ ସେ କହିଥିଲେ ,ଏବେ ଆମକୁ ବିଦେଶୀ ସାମଗ୍ରୀରୁ ନିଜକୁ ମୁକ୍ତ କରିବାକୁ ପଡିବ। ଆମକୁ ଏପରି ଜିନିଷ କିଣିବାକୁ ପଡିବ ଯାହା ଭାରତରେ ନିର୍ମିତ ଏବଂ ଆମ ଦେଶବାସୀଙ୍କ ଝାଳ ଥିବ। ଆମକୁ ଆମର ଘରକୁ ସ୍ୱଦେଶୀର ପ୍ରତୀକ କରିବାକୁ ପଡିବ।ପ୍ରଧାନମନ୍ତ୍ରୀ ମୋଦୀ କହିଛନ୍ତି, “ଗର୍ବର ସହିତ କୁହନ୍ତୁ, ‘ମୁଁ ସ୍ୱଦେଶୀ ସାମଗ୍ରୀ କିଣେ, ମୁଁ ସ୍ୱଦେଶୀ ସାମଗ୍ରୀ ବିକେ।’ ଏହା ପ୍ରତ୍ୟେକ ଭାରତୀୟଙ୍କ ମନୋଭାବ ହେବା ଉଚିତ। ଯେତେବେଳେ ଏହା ହେବ, ଭାରତ ଦ୍ରୁତ ଗତିରେ ବିକାଶ କରିବ।
