ନୂଆଦିଲ୍ଲୀ: ଇସ୍ରାଏଲ ଓ ଇରାନ ମଧ୍ୟରେ ଚାଲିଥିବା ଯୁଦ୍ଧ ଯୋଗୁଁ ଇରାନରେ ପରିସ୍ଥିତି ଦିନକୁ ଦିନ ଖରାପ ହେଉଛି । ଏହି କାରଣରୁ ଭାରତୀୟ ଦୂତାବାସ ଆଜି ନିଜ ନାଗରିକମାନଙ୍କୁ ତୁରନ୍ତ ତେହେରାନ ଛାଡ଼ିବାକୁ ଅନୁରୋଧ କରିଛି। ଇରାନର ରାଜଧାନୀ ତେହେରାନ ଇସ୍ରାଏଲୀ ଡ୍ରୋନ୍ ଏବଂ କ୍ଷେପଣାସ୍ତ୍ର ଦ୍ୱାରା ନିରନ୍ତର ବିମାନ ଆକ୍ରମଣର ଶିକାର ହେଉଥିବା ବେଳେ ଯଦି ନିଜେ ପାରୁଛ ତାହେଲେ ଦେଶ ଛାଡ଼ିଯିବାକୁ ଅନୁରୋଧ କରିଛି ଭାରତ। ସମସ୍ତ ଭାରତୀୟ ନାଗରିକ ଏବଂ ପିଆଇଓ ଯେଉଁମାନେ ନିଜସ୍ୱ ସମ୍ବଳ ବ୍ୟବହାର କରି ତେହେରାନରୁ ବାହାରକୁ ଯାଇପାରିବେ ସେମାନଙ୍କୁ ସହର ବାହାରେ ଏକ ସୁରକ୍ଷିତ ସ୍ଥାନକୁ ଯିବାକୁ ପରାମର୍ଶ ଦିଆଯାଇଛି। ଦୂତାବାସ ମଧ୍ୟ ଯେଉଁ ଭାରତୀୟ ନାଗରିକମାନେ ଏପର୍ଯ୍ୟନ୍ତ ସେମାନଙ୍କର ଉପସ୍ଥିତି ପଞ୍ଜିକୃତ କରିନାହାଁନ୍ତି ସେମାନଙ୍କୁ ତୁରନ୍ତ ମିଶନ ସହିତ ଯୋଗାଯୋଗ କରିବାକୁ ଅନୁରୋଧ କରିଛି। ଏଥିପାଇଁ ତିନୋଟି ଜରୁରୀକାଳୀନ ହେଲ୍ପଲାଇନ୍ ନମ୍ବର ସେୟାର କରାଯାଇଛି: +98 9010144557, +98 9128109115, ଏବଂ +98 9128109109। ବର୍ଦ୍ଧିତ ଉତ୍ତେଜନାକୁ ଦୃଷ୍ଟିରେ ରଖି, ଭାରତ ମଧ୍ୟ ଇରାନରୁ ଏହାର ନାଗରିକଙ୍କୁ ସ୍ଥାନାନ୍ତର ଆରମ୍ଭ କରିଛି। ସରକାରୀ ସୂତ୍ର ଅନୁସାରେ, ସୋମବାର ଏବଂ ମଙ୍ଗଳବାର ମଧ୍ୟବର୍ତ୍ତୀ ରାତିରେ ୧୧୦ ଜଣ ଭାରତୀୟ ନାଗରିକଙ୍କ ପ୍ରଥମ ଦଳ ଆର୍ମେନିଆ ପାର ହୋଇଥିଲେ। ଭାରତ ଇରାନକୁ ଦେଶରେ ଫସି ରହିଥିବା ୧୦ ହଜାରରୁ ଅଧିକ ଛାତ୍ରଛାତ୍ରୀଙ୍କୁ ସୁରକ୍ଷିତ ସ୍ଥାନାନ୍ତର ସୁନିଶ୍ଚିତ କରିବାକୁ ଅନୁରୋଧ କରିଥିଲା। ଏହାର ଜବାବରେ, ତେହେରାନ, ତାର ଆକାଶ ସୀମା ବନ୍ଦ କରିବା ଦର୍ଶାଇ, ଛାତ୍ରମାନଙ୍କୁ ସ୍ଥଳ ସୀମା ଦେଇ ଆଜରବାଇଜାନ, ତୁର୍କମେନିସ୍ତାନ କିମ୍ବା ଆଫଗାନିସ୍ତାନକୁ ପ୍ରସ୍ଥାନ କରିବାକୁ ପରାମର୍ଶ ଦେଇଥିଲା।
