ନୂଆଦିଲ୍ଲୀ: ଦୁଲାରଚାନ୍ଦ ଯାଦବ ହତ୍ୟା ମାମଲାରେ ଜେଡିୟୁ (JDU) ନେତା ଅନନ୍ତ ସିଂହଙ୍କୁ ଏକ ବଡ଼ ଝଟକା ଲାଗିଛି। ସୁପ୍ରିମକୋର୍ଟ ତାଙ୍କ ଜାମିନ ଆବେଦନକୁ ଖାରଜ କରିଦେଇଛନ୍ତି। କୋର୍ଟ ସ୍ପଷ୍ଟ କରିଛନ୍ତି ଯେ ହତ୍ୟା ଭଳି ସମ୍ବେଦନଶୀଳ ମାମଲାକୁ କେବଳ ରାଜନୈତିକ ବିବାଦ ଭାବରେ ଦେଖିବା ଠିକ୍ ନୁହେଁ। ତଦନ୍ତ ଚାଲିଥିବାବେଳେ ବିଚାର ସମୟରେ ସାକ୍ଷୀମାନଙ୍କୁ ଯାଞ୍ଚ କରାଯିବ ଏବଂ ଅଭିଯୁକ୍ତଙ୍କୁ ଆତ୍ମସମର୍ପଣ କରିବାକୁ ପଡ଼ିବ। ସୁପ୍ରିମକୋର୍ଟ ହାଇକୋର୍ଟଙ୍କ ପୂର୍ବ ନିର୍ଦ୍ଦେଶକୁ ସ୍ଥଗିତ ରଖି ଅନନ୍ତ ସିଂହଙ୍କୁ ଡିସେମ୍ବର ୧ ତାରିଖ ସୁଦ୍ଧା ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦେଇଛନ୍ତି। ସେହିପରି ପୋଲିସକୁ ମଧ୍ୟ ଆଗାମୀ ଚାରି ମାସ ମଧ୍ୟରେ ତଦନ୍ତ ପ୍ରକ୍ରିୟା ଶେଷ କରିବାକୁ କୁହାଯାଇଛି। ତେବେ ଝିଅର ବିବାହକୁ ଦର୍ଶାଇ ଅନନ୍ତ ସିଂହ ତୁରନ୍ତ ଆତ୍ମସମର୍ପଣରୁ କିଛି ମହଲତ ଲୋଡ଼ିଥିଲେ। ଅନ୍ୟପକ୍ଷରେ, ଏହି ସମଗ୍ର ପ୍ରସଙ୍ଗରେ ଜେଡିୟୁ କଠୋର ଆଭିମୁଖ୍ୟ ଗ୍ରହଣ କରି ତାଙ୍କୁ ଦଳରୁ ବହିଷ୍କାର କରିଛି। ଏପରିକି ତାଙ୍କୁ ବିଧାନସଭାରୁ ମଧ୍ୟ ବହିଷ୍କାର କରିବା ପାଇଁ ଦଳ ପକ୍ଷରୁ ବାଚସ୍ପତିଙ୍କୁ ଚିଠି ଲେଖାଯାଇଛି। ଏନେଇ ପ୍ରଶ୍ନ ହେବାରୁ ଜେଡିୟୁର ଜାତୀୟ କାର୍ଯ୍ୟକାରିଣୀ ସଭାପତି ସଞ୍ଜୟ କୁମାର ଝା କହିଛନ୍ତି ଯେ ଦଳ ସର୍ବଦା ଶୃଙ୍ଖଳାକୁ ଗୁରୁତ୍ୱ ଦିଏ ଏବଂ ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ମତାମତ ଏଥିରେ ଚୂଡ଼ାନ୍ତ ଅଟେ।
