ନୂଆଦିଲ୍ଲୀ: ମହାରାଷ୍ଟ୍ର ରାଜନୀତିରେ ଏମଏନଏସ ମୁଖ୍ୟ ରାଜ ଠାକରେଙ୍କୁ ନେଇ ଚର୍ଚ୍ଚା ଓ ଆଲୋଚନା ଲାଗି ରହିଛି | ବିଶେଷ ସୂତ୍ରଗୁଡିକରୁ ପ୍ରକାଶ ଯେ ରାଜ ଠାକରେ ଏନଡିଏରେ ଯୋଗ ଦେଇପାରନ୍ତି। ବିଜେପି ରାଜ ଠାକରେଙ୍କୁ ଦିଲ୍ଲୀକୁ ନିମନ୍ତ୍ରଣ କରିଛି। ବାସ୍ତବରେ ଗତକାଲି ରାଜ ଠାକରେ ଉପ-ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କୁ ଭେଟିଥିଲେ। ବିଶେଷ କରି ରାଜ ଠାକରେଙ୍କର ମୁମ୍ବାଇ ଏବଂ ଏହାର ଆଖପାଖ ଅଞ୍ଚଳରେ ବେଶ ପ୍ରଭାବ ରହିଛି । ଆଉ ଗତକାଲି ଏମଏନଏସ ମୁଖ୍ୟଙ୍କ ସହ ଏମଏନଏସ ନେତା ଉପ-ମୁଖ୍ୟମନ୍ତ୍ରୀଙ୍କୁ ଭେଟିବା ପରେ ଏହାକୁ ନେଇ ଚର୍ଚ୍ଚା ଜୋର ଧରିଛି ।
ଏହାପୂର୍ବରୁ ରାଜ ଠାକରେ ଶିବସେନା ମୁଖ୍ୟ ତଥା ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ମଧ୍ୟ ଭେଟିଥିଲେ। ମହାରାଷ୍ଟ୍ରରେ ରାଜ ଠାକରେଙ୍କ ଭାବମୂର୍ତ୍ତି ହିନ୍ଦୁତ୍ୱ ନେତା ଭାବରେ ରହିଛି। ତେବେ ବିଧାନସଭା ନିର୍ବାଚନରେ ତାଙ୍କ ଦଳ ବିଶେଷ କିଛି କମାଲ କରିପାରିନଥିଲା । ଯଦି ରାଜ ଠାକରେ ଏନଡିଏରେ ଯୋଗ ଦିଅନ୍ତି ତେବେ ମହାରାଷ୍ଟ୍ରରେ ଏନଡିଏର ଅଧିକ ପ୍ରଭାବ ପଡିବ ବୋଲି ରାଜନୈତିକ ସମୀକ୍ଷକମାନେ ଆକଳନ କରୁଛନ୍ତି । ସମ୍ପ୍ରତି ଏନଡିଏରେ ଏକନାଥ ସିନ୍ଦେ, ବିଜେପି ଏବଂ ଅଜିତ ପାୱାର ଥିବାବେଳେ ରାଜ ଠାକରେ ହେଉଛନ୍ତି ଉଦ୍ଧବ ଠାକରେଙ୍କ ସମ୍ପର୍କୀୟ। ରାଜ ଠାକରେ, ଉଦ୍ଧବ ଠାକରେଙ୍କ ପିତା ବାଲ ଠାକରେଙ୍କୁ ତାଙ୍କ ଆଦର୍ଶ ଭାବରେ ବିବେଚନା କରନ୍ତି।
