ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ୭୫ବର୍ଷ ବୟସରେ ପାଦ ଥାପିଛନ୍ତି। ତାଙ୍କର ଜନ୍ମଦିନରେ ବିଶ୍ୱର କୋଣଅଣୁକୋଣରୁ ଶୁଭେଚ୍ଛାର ବାର୍ତ୍ତା ଆସୁଛି। ପ୍ରଧାନମନ୍ତ୍ରୀ ମୋଦୀଙ୍କୁ ଟେଲିଫୋନ୍ ଓ ସାମାଜିକ ଗଣମାଧ୍ୟମରେ ବିଶ୍ୱର ବିଶିଷ୍ଟ ଲୋକେ ଶୁଭେଚ୍ଛା ବାର୍ତ୍ତା ଜଣାଉଛନ୍ତି। ଏହି କ୍ରମରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମଧ୍ୟ ନରେନ୍ଦ୍ର ମୋଦୀଙ୍କୁ ଜନ୍ମଦିନରେ ହାର୍ଦ୍ଦିକ ଅଭିନନ୍ଦନ ଏବଂ ଶୁଭେଚ୍ଛା ଜଣାଇଛନ୍ତି। ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଧ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସାମାଜିକ ଗଣମାଧ୍ୟମରେ ଜନ୍ମଦିନର ହାର୍ଦ୍ଦିକ ଶୁଭେଚ୍ଛା ଓ ଶୁଭକାମନା ବୋଲି କହିଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଦେଶ ଏବଂ ବିଶ୍ୱରୁ ମିଳିଥିବା ୧୩୦୦ ଉପହାରର ଅନଲାଇନ ନିଲାମ ସେପ୍ଟେମ୍ବର ୧୭ ତାରିଖ ଅର୍ଥାତ୍ ଆଜି ତାଙ୍କ ଜନ୍ମଦିନରୁ ଆରମ୍ଭ ହେବ। ଆସନ୍ତା ଅକ୍ଟୋବର ୨ ତାରିଖ ପର୍ଯ୍ୟନ୍ତ ଏହି ପ୍ରକ୍ରିୟା ଜାରି ରହିବ। ଏହି ସମୟ ମଧ୍ୟରେ ଉପହାର ନିଲାମରୁ ପ୍ରାପ୍ତ ରାଶି ଗଙ୍ଗା ସଫା କରିବା ପାଇଁ ଆରମ୍ଭ ହୋଇଥିବା ନମାମି ଗଙ୍ଗେ ମିଶନରେ ଖର୍ଚ୍ଚ କରାଯିବ। ପ୍ରଧାନମନ୍ତ୍ରୀଙ୍କ ଉପହାର ନିଲାମ ୨୦୧୯ ମସିହାରେ ଆରମ୍ଭ ହୋଇଥିଲା ଏବଂ ଏହା ସପ୍ତମ ସଂସ୍କରଣ। ଏଥର ନିଲାମ ପାଇଁ ରଖାଯାଇଥିବା ପ୍ରମୁଖ ଉପହାର ମଧ୍ୟରେ ପାରାଲିମ୍ପିକ୍ସ ୨୦୨୪ର ଖେଳାଳିମାନଙ୍କଠାରୁ ପ୍ରାପ୍ତ ଉପହାର ସବୁଠାରୁ ଗୁରୁତ୍ୱପୂର୍ଣ୍ଣ। ନିଲାମ ପାଇଁ ରଖାଯାଇଥିବା ଉପହାରର ମୂଳ ମୂଲ୍ୟ ୧୭ ଶହରୁ ୧.୦୩ କୋଟି ପର୍ଯ୍ୟନ୍ତ ରଖାଯାଇଛି।
କେନ୍ଦ୍ର ସଂସ୍କୃତି ମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ କହିଛନ୍ତି ଯେ ଗତ ଛଅ ବର୍ଷ ମଧ୍ୟରେ ପ୍ରଧାନମନ୍ତ୍ରୀଙ୍କ ସାତ ହଜାରରୁ ଅଧିକ ଉପହାର ନିଲାମ ପାଇଁ ରଖାଯାଇଛି, ଯାହା ଦ୍ୱାରା ୫୦.୩୩ କୋଟି ଟଙ୍କା ସଂଗ୍ରହ ହୋଇଛି। ଏହି ରାଶି ନମାମି ଗଙ୍ଗେ ମିଶନକୁ ଦାନ କରାଯାଇଛି। ଏଥର ମଧ୍ୟ ଅନେକ ଗୁରୁତ୍ୱପୂର୍ଣ୍ଣ ଉପହାର ନିଲାମ ପାଇଁ ରଖାଯାଇଛି, ଯେଉଁଥିରେ ଖେଳାଳିମାନଙ୍କଠାରୁ ପ୍ରାପ୍ତ ଉପହାର, ଦେବଦେବୀଙ୍କ ପ୍ରତିମା, ଚିତ୍ର, ଟୋପି, ଖଣ୍ଡା, ମନ୍ଦିର ପ୍ରତିମା ଇତ୍ୟାଦି ଅନ୍ତର୍ଭୁକ୍ତ। ସେପ୍ଟେମ୍ବର ୧୭ ତାରିଖରୁ ଯେକୌଣସି ବ୍ୟକ୍ତି ଏହି ସମସ୍ତ ଉପହାର ପାଇଁ ଅନଲାଇନ୍ରେ ବିଡ୍ କରିପାରିବେ। ପ୍ରଧାନମନ୍ତ୍ରୀଙ୍କ ଦ୍ୱାରା ନିଲାମ ପାଇଁ ରଖାଯାଇଥିବା ପ୍ରମୁଖ ଉପହାରଗୁଡ଼ିକ ମଧ୍ୟରେ ତୁଳଜା ଭବାନୀଙ୍କ ପ୍ରତିମା ଅନ୍ତର୍ଭୁକ୍ତ, ଯାହାର ମୂଳ ମୂଲ୍ୟ ୧.୦୩ କୋଟି ଟଙ୍କା, ପାରାଅଲିମ୍ପିକ୍ ୨୦୨୪ ରୌପ୍ୟ ପଦକ ବିଜେତା ନିଷାଦ କୁମାର, କାଂସ୍ୟ ପଦକ ବିଜେତା ଅଜିତ ସିଂହ ଏବଂ ସିମରନ ଶର୍ମାଙ୍କ ଜୋତା ଅନ୍ତର୍ଭୁକ୍ତ, ପ୍ରତ୍ୟେକର ମୂଳ ମୂଲ୍ୟ ୭.୭୦ ଲକ୍ଷ ଟଙ୍କା।
