ନୂଆଦିଲ୍ଲୀ: ଜିଏସଟି ପରିଷଦର ୫୬ତମ ବୈଠକରେ ଏକ ବଡ଼ ନିଷ୍ପତ୍ତି ନିଆଯାଇଛି। କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ହୋଇଥିବା ଏହି ବୈଠକରେ ଜିଏସଟି ସ୍ଲାବକୁ ତିନିରୁ ହ୍ରାସ କରି ଦୁଇଟି କରାଯାଇଛି। ଏବେ କେବଳ ୫% ଏବଂ ୧୮% ସ୍ଲାବ ରହିବ। ୨୮% ସ୍ଲାବକୁ ପୂରାପୂରି ହଟାଇ ଦିଆଯାଇଛି। ଏହା ସହିତ ବିଲାସପୂର୍ଣ୍ଣ ଓ ତମାଖୁ ଦ୍ରବ୍ୟ ପାଇଁ ଏକ ସ୍ୱତନ୍ତ୍ର ୪୦% ସ୍ଲାବ ରଖାଯାଇଛି। ଏହି ନୂଆ ହାର ୨୨ ସେପ୍ଟେମ୍ବର ୨୦୨୫ରୁ ଲାଗୁ ହେବ। ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି, “ଏହି ପରିବର୍ତ୍ତନ ସାଧାରଣ ଲୋକଙ୍କୁ ଧ୍ୟାନରେ ରଖି କରାଯାଇଛି। ଦୈନନ୍ଦିନ ବ୍ୟବହାରର ଜିନିଷ ଉପରେ ଲାଗୁ ହେଉଥିବା ଟିକସର ସମୀକ୍ଷା କରାଯାଇଛି। ଅଧିକାଂଶ ଜିନିଷରେ ଟିକସ ହାର ବହୁତ କମିଛି।” ପ୍ରାୟ ୧୭୫ଟି ଦୈନନ୍ଦିନ ବ୍ୟବହୃତ ଜିନିଷ ଶସ୍ତା ହେବ। ଏହା ମଧ୍ୟରେ କ୍ଷୀର, ପନୀର, ଲୁଣି ଖାଦ୍ୟ ଓ ରୁଟି ଆଦି ରହିଛି। ବର୍ତ୍ତମାନ ୧୨% ଟିକସ ଲାଗୁଥିବା ପ୍ରାୟ ୯୯% ଜିନିଷ ଏବେ ୫% ସ୍ଲାବକୁ ଆସିବ। ସେହିପରି ୨୮% ଟିକସ ଥିବା ପ୍ରାୟ ୯୦% ଜିନିଷ ୧୮% ସ୍ଲାବକୁ ସ୍ଥାନାନ୍ତରିତ ହେବ। ସେହିପରି ବ୍ୟକ୍ତିଗତ ସ୍ୱାସ୍ଥ୍ୟ ଏବଂ ଜୀବନ ବୀମା ଏବେ ଜିଏସଟି ମୁକ୍ତ ରହିଛି।ବୀମା ବ୍ୟତୀତ, ଅନେକ ଦୈନନ୍ଦିନ ବ୍ୟବହାରର ଜିନିଷ ଶୂନ୍ୟ ଜିଏସଟି ବର୍ଗକୁ ଆଣି ଦିଆଯାଇଛି। ଏହା ମଧ୍ୟରେ ଅଲଟ୍ରା-ହାଇ ଟେମ୍ପରେଚର କ୍ଷୀର, ପନୀର, ରୁଟି, ଚାପାତି ଓ ପରଟା ରହିଛି। ସ୍ୱାସ୍ଥ୍ୟ କ୍ଷେତ୍ରରେ ୩୩ଟି ଜୀବନ ରକ୍ଷାକାରୀ ଔଷଧ ଏବଂ କ୍ୟାନସର, ବିରଳ ଓ ଦୀର୍ଘସ୍ଥାୟୀ ରୋଗ ଚିକିତ୍ସା ପାଇଁ ବ୍ୟବହୃତ ୩ଟି ଗୁରୁତ୍ୱପୂର୍ଣ୍ଣ ଔଷଧ ମଧ୍ୟ ଶୂନ୍ୟ ଜିଏସଟି ବର୍ଗରେ ଅନ୍ତର୍ଭୁକ୍ତ।ଏହି ନୂଆ ଜିଏସଟି ନିୟମ ସମଗ୍ର ଦେଶରେ ୨୨ ସେପ୍ଟେମ୍ବର ୨୦୨୫ରୁ ଲାଗୁ ହେବ।
